काठमाडौ १६ भदौ ।
अर्थमन्त्री ज्ञानेन्द्रबहादुर कार्कीले मुलुकको अर्थतन्त्रमा सकारात्मक सूचक देखिन थालेकाले लगानीका क्षेत्रमा क्रियाशील हुन आग्रह गर्नुभएको छ ।
वर्तमान अर्थतन्त्र चुनौती र अवसरको दोसाँधमा रहेको भन्दै उहाँले उद्योग व्यवसायी एवं सञ्चार क्षेत्रले दिगो अर्थतन्त्रको विकासका लागि सहयोग गर्नुपर्ने आवश्यकता औल्याउनुभयो ।
नेपाल आर्थिक पत्रकार समाज सेजनकोको १८ आँैं वार्षिक साधारणसभा तथा निर्वाचन कार्यक्रमलाई राजधानीमा सम्बोधन गर्दै उहाँले मुलुकलाई संवृद्धिको दिशामा अगाडि बढाउन सरकार क्रियाशील रहेको बताउनु भयो ।
उहाँले अर्थतन्त्रको दायरासमेत फराकिलो हुँदै गएकाले थप लगानी गर्नु सहज हुनेमा जोड दिनुभयो । लगानी भित्र्याउन र त्यसलाई सहीरूपले परिचालन गर्न जरुरी रहेको चर्चा गर्दै उहाँले शहरी र ग्रामीण क्षेत्रमा आर्थिक गतिविधि बढाउनुपर्ने जिकिर गर्नुभयो ।
अहिले संविधान कार्यान्वयनको प्रक्रिया अगाडि बढेकोकाले प्रदेश र संघको निर्वाचनपछि मुलुक पूर्णरुपमा राजनीतिक स्थिरताको चरणमा प्रवेश गर्ने र आर्थिक संवृृद्धिका मार्ग समेत प्रशस्त हुने उल्लेख गर्नुभयो ।
नेपाल राष्ट्र बैंकका गर्भनर डा चिरञ्जीवी नेपालले २३ वर्षयता मुलुकको आर्थिक वृद्धिदर ६.९ प्रतिशत रहेको र १३ वर्षपछि मुद्रास्फिति दर समेत चार प्रतिशतको हाराहारीमा रहेकाले आर्थिक क्षेत्र थप सवल बन्दै गएको तथा लगानीका वातावरण समेत बनेको छ धारणा राख्नुभयो ।
कार्यक्रममा सहभागी निजी क्षेत्रका प्रतिनिधिले संविधान कार्यान्यवको प्रक्रियासँगै मुलुकमा लगानीको वातावरण बनेकामा खुसी व्यक्त गर्दै दीर्घकालीन सुधारका लागि सबैको साथ र सहयोग जरुरी रहेको आवश्यता औल्याएका छन् ।
