काठमाडौ ३ भदौ ।
बाढीका कारण डुबानमा परेपछि अवरुद्ध रहेको विराटनगर विमानस्थल आजदेखि सन्चालनमा आएको छ । यद्यपी विमानस्थल पूर्ण रुपमा सन्चालनमा आउनका लागि भने अझै केही समय लाग्ने जनाइएको छ ।
विमानस्थललाई पूर्ण रुपमा सञ्चालनका लागि योग्य बनाउन अझै केही समय लाग्ने भएकाले आजदेखि दिनको समयमा मात्र विमानस्थल सन्चालन गर्ने तयारी भएको क्षेत्रीय निर्देशक सुरेशमान सिंहले जानकारी दिनुभयो ।
विमानस्थल सञ्चालनमा आउने भएसँगै आज ५ वटा उडान हुने भएको छ । यति एयरलायन्सले २ वटा उडान भर्नेछ भने सूर्य एयरलायन्सले ३ वटा उडान भर्ने प्राधिकरणले जानकारी दिएको छ । बिहान ९ वजे सुर्य एयरलायन्सले पहिलो उडान सुरु गरेको छ ।
बुद्ध एयरलायन्सले आइतबारदेखि मात्रै उडान सुचारु गर्नेछ भने नेपाल एयरलायन्सले सोमबारदेखि उडान भर्ने तयारी गरेको छ । बाढीका कारण विमानस्थलमा १० करोड बराबरको क्षति भएको नेपाल नागरिक उड्यन प्राधिकरणले जनाएको छ ।
विमानस्थल पहिलाको अबस्थामा आउनका लागि अझै एक महिना लाग्ने प्राधिकरणका महानिर्देशक सचिन गौतमले बताउनु भयो ।
