तुलसीपुर, ३० जेठ । मध्यपश्चिम प्रहरी प्रमुख प्रहरी नायब महानिरीक्षक विजय कायस्थले तुलसीपुरका व्यवसायी राजकुमार श्रेष्ठका बारेमा चाँडै सत्यतथ्य बाहिर आउने बताउनु भएको छ ।
रिपोर्टर्स क्लब नेपाल दाङले आज तुलसीपुरमा गरेको साक्षात्कारमा उहाँले घटनाका बारेमा सुक्ष्म अध्ययन भइरहेको भन्दै दुई÷चार दिनमै सत्यतथ्य बाहिर आउने बताउनुभयो ।
उहाँले घटनामा महिलाको प्रयोग भएको हुन सक्ने भन्दै तर महिला भए नभएको बारेमा कसैले नदेखेको हुँदा अहिले नै भन्न नसकिने उल्लेख गर्नुभयो ।
घटनापछि दाङ र सल्यान प्रहरी परिचालन गरेर खोजी कार्य तीव्र पारिएको
उहाँको भनाइ थियो ।
सो अवसरमा उहाँले घटनाका बारेमा सूचना दिने व्यक्तिलाई एक लाख पुरस्कार दिने घोषणासमेत गर्नुभयो ।
व्यवसायी श्रेष्ठ गत शुक्रबार बेलुका ८ बजे घरबाट बाहिर निस्कनुभएको र हालसम्म पनि उहाँको अवस्था अज्ञात नै रहेको छ । यसअघि शनिबार उहाँ सवार गाडी सल्याङनको सोलावाङमा बेवारिसे अवस्थामा फेला परेको थियो ।
