काठमाडौँ, २७ जेठ । उपत्यकाका प्रमुख नदी र चक्रपथ सफाइ गरी ४६ मेट्रिक टन फोहर व्यवस्थापन गरिएको छ ।
वाग्मती सफाइ महाअभियानको २१३ औँ हप्तामा आज त्रिपुरेश्वर नयाँपुलमा सफाइ गरि १५ मेट्रिक टन फोहर व्यवस्थापन गरिएको अभियन्ता उमेश बोहराले जानकारी दिनुभयो ।
गुह्येश्वरीमाथिको वाग्मतीमा गरेको १७४ औँ हप्ताको सफाइमा आज गोकर्णेश्वर नगरपालिका वडा नं ५ स्थित वाग्मती नदी किनारमा बनाइएको उद्यानमा सफाइ गरी दुई मेट्रिक टन फोहर व्यवस्थापन गरिएको छ ।
यसैगरी रुद्रमती सफाइको १७२ औँ हप्तामा आज रातोपुल–गौशाला–बत्तीसपुतली राममन्दिर–सेतोपुल हुँदै मैतीदेवी मन्दिरसम्म जनचेतनामूलक घरदैलो अभियान सहित सरसफाइ गरिएको थियो ।
आजको सफाइबाट एक मेट्रिक टन फोहर व्यवस्थापन गरिएको अभियन्ता रोहित गिरीले जानकारी दिनुभयो ।
विष्णुमती सफाइको १४४ औँ हप्तामा आज तारकेश्वर नगरपालिकाको वडा नं १० स्थित तारकेश्वर गुम्बामा सफाइ गरी सात मेट्रिक टन फोहर व्यवस्थापन गरियो । सफाइमा २०० भन्दा बढी अभियन्ताको सहभागिता थियो ।
तिलगङ्गास्थित वाग्मती किनारमा गरेको १२१ औँ हप्ताको सफाइमा एक मेट्रिक टन फोहर निकालिएको छ ।
यसैगरी चक्रपथ सफाइको नवौँ हप्तामा आज सामाखुसीचोकबाट पश्चिमतर्फ सफाइ गरी २० मेट्रिक टन फोहर व्यवस्थापन गरिएको थियो ।
