– सिरियस रबिन
जिन्दगी यस्तै रहेछ
अनगिन्ती चोट सहेर बाँच्नु पर्ने
जिन्दगी एउटा दोबाटो रहेछ
सुख दुःखको मिलन हुने ।
जिन्दगी कर्कलाको पानी रहेछ
कति खेर पोख्छ थाहा नहुने
जिन्दगी भाग्यरेखा रहेछ
मेटेर मेट्न नसकिने ।
जिन्दगी गन्तव्य रहेछ
वेदनाको भारी बोकी यात्रा गर्नु पर्ने
जिन्दगी सिमलको भुवा रहेछ
कति खेर उडेर जान्छ थाहा नै नहुने ।
जिन्दगी व्यथा रहेछ
कति खेर दुख्छ थाहा नहुने
जिन्दगी औँसीको रात रहेछ
जता ततै अन्धकार हुने ।
जिन्दगी उडेको बेलुन रहेछ
कहाँ पुगेर फुट्छ थाहा नहुने
जिन्दगी बादल रहेछ
धुम्म भई टोलाइ रहनु पर्ने ।
जिन्दगी नदी रहेछ
सलल बगूँभन्दा डाँडै डाँडाले छेक्ने
जिन्दगी बादलपारिको घाम रहेछ
कति खेर डुब्छ थाहा नहुने ।
जिन्दगी मुटु रहेछ
कति खेर दुख्छ, पोल्छ थाहा नहुने
जिन्दगी बाध्यता रहेछ
हृदय दुःख र वेदनाले भरिए पनि
दुनियाँको सामु मुस्कुराउनु पर्ने ।
सारमा जिन्दगी त
राजा मिदास र सिसिफसको मिथ पो रहेछ
जति पाउँछु भन्यो त्यति नै गुमाउनु पर्ने ।
