चितवन, १८ जेठ ।
नेकपा एमाले सचिव प्रदीप ज्ञवालीले भरतपुर महानगरपालिकामा खटिएका मुख्य निर्वाचन अधिकृत कविप्रसाद न्यौपानेले दोहोरो अभिब्यत्ति दिएको भन्दै आक्रोश पोख्नुभएको छ ।
एमाले चितवनले आज मतगणनालाई निरन्तरता दिन माग सहित जिबिस अस्पताल चोकमा आयोजना गरेको धर्ना कार्यक्रमलाईसम्बोधन गर्दै ज्ञवालीले षड्यन्त्रको मतियार नबन्न मुख्य निर्वाचन अधिकृतलाई चेतावनी दिनुभएको हो ।
‘निर्वाचन अधिकृतले आफू ट्वाइलेट गएको बेला मतपत्र च्यातियो भन्नुहुन्छ, अर्को्तिर मतपत्र कब्जा भयो भनेर प्रतिवेदन लेख्नुभयो’ ज्ञवालीले प्रश्न गर्दै भन्नुभयो , ‘अनि ट्वाइलेट गएको बेला कसरी कब्जा भएको देख्नुभयो तपाईंले ?’
निर्वाचन अधिकृतलाई चेतावनी दिँदै उहाँले भन्नुभयो , ‘षड्यन्त्रको मतियार नबन्नोस् । तपाईं न्यायाधीश, न्यायमूर्ति हो । कुनै पार्टीको प्रवक्ता वा कार्यकर्ताजस्तो भएर बोल्न सुहाउँदैन । त्यो कुरा एमालेका लागि मञ्जुर छैन ।’
भरतपुरको विषय जित, हारको नभएको भन्दै उहाँले लोकतन्त्र रहने हो कि होइन भन्ने प्रश्न भएको बताउनु भयो ।
आइतबार राति एमाले र माओवादी केन्द्रका नेता, कार्यकर्ताबीचको विवादले भरतपुर महानगरमा मतपत्र च्यातिएपछि गणना रोकिएको छ । कांग्रेस र माओवादीले भरतपुरको १९ नम्बर वडामा पुनस् मतदान हुनुपर्ने माग गरेका छन् ।
एमालेले मतगणनाको माग गर्दै जिल्लामा विभिन्न दबाबमूलक कार्यक्रम गर्दै आएको छ भने यही विषयलाई लिएर आज पनि संसद् बैठक समेत चल्न दिएन । भरतपुर महानगर मेयरमा कांग्रेस–माओवादी गठबन्धनबाट रेणु दाहाल र एमालेका देवी ज्ञवाली चुनावी प्रतिस्पर्धामा छन् ।
