काठमाणडाै,१८ जेठ ।
बहुमतीय प्रक्रियाबाट प्रधानमन्त्री बन्ने प्रयासमा रहेका कांग्रेस सभापति शेरबहादुर देउवाले दोस्रो चरणको निर्वाचनअघि नै सानो आकारको मन्त्रिपरिषद् बनाउने तयारी गरेका छन् ।
त्यसका लागि सत्तासाझेदार कांग्रेस र माओवादी केन्द्रको कार्यदल नै बनाएकाे छ । त्यसले आगामी सरकारको मन्त्रिपरिषद्मा पहिलो चरणमा क–कसलाई पठाउने भन्नेसहितका विषयमा निर्णय लिने भएको छ ।
प्रधानमन्त्री पुष्पकमल दाहाल प्रचण्डले पदबाट राजीनामा दिएपछि नयाँ सरकार गठनका लागि कांग्रेसबाट विमिलेन्द्र निधि र रमेश लेखक तथा माओवादी केन्द्रबाट कृष्णबहादुर महरा र वर्षमान पुन अनन्त सदस्य रहेको चार सदस्यीय कार्यदल बनेको छ । त्यही कार्यदलले बनाएको सहमतिअनुसार सुरुमा सानो आकारको मन्त्रिपरिषद् बनाउने तयारी देउवाको रहेको स्रोतले बताएकाे छ ।
सानो आकारमा देउवाजीले आफूलाई काम गर्न सहज हुने व्यक्तिलाई लैजानुहुन्छ । दोस्रो चरणमा मन्त्री पठाउँदा छलफल हुन्छ ।’ स्रोतका अनुसार सभापति देउवा र नेता रामचन्द्र पौडेलबीच सकभर वर्तमान सरकारमा रहेका मन्त्री नदोहोर्याउने भन्नेमा मतैक्यता छ ।
‘दोस्रो चरणको निर्वाचनसम्म सानो मन्त्रिपरिषद् मात्रै बनाउने चाहना शेरबहादुरकाे रहेकाले यसबारेमा भोलि (बिहीबार)बाट छलफल हुन्छ ।’
अहिले सत्तागठबन्धनमा नरहेको राष्ट्रिय प्रजातन्त्र पार्टी पनि देउवाको नेतृत्वमा नयाँ सरकार गठन गर्न सकारात्मक छ । देउवाले मंगलबार बोलाएको सर्वदलीय बैठकमा राप्रपा अध्यक्ष कमल थापाले भनेका थिए, ‘कांग्रेसको नेतृत्वमा बहुमतीय सरकार बन्ने हो भने दुई दलबीच नीतिगत विषय र व्यावहारिक विषयमा छलफल हुँदा सहमति हुन सक्यो भने त्यो सरकारमा जाने विषयमा हाम्रो सकारात्मक धारणा रहन्छ ।’ संसद्मा राप्रपाको ३७ सिट छ । यो संख्या पनि जोडियो भने देउवाको पक्षमा ३४८ मत पुग्छ ।
