काठमाडौ १६ जेठ ।
जेठ ३१ गतेका लागि तय दोस्रो चरणको स्थानीय तह निर्वाचन असार ९ गते सार्ने सरकारको निर्णयपछि निर्वाचन आयोग कार्यतालिका परिवर्तनको गृहकार्यमा जुटेको छ ।
यसअघि घोषणा गरिएको मिति सार्दै हिजो बसेको मन्त्रीपरिषद बैठकले दोस्रो चरणको निर्वाचन असार ९ गते गर्ने निर्णय गरेको थियो ।
यद्यपी मन्त्री परिषद बैठकको निर्णय आयोगलाई प्राप्त भईनसकेकाले नयाँ कार्यातालिका निर्माण गर्न भने नसकेको आयोगका सहसचिव एवम् प्रवक्ता सुर्य प्रसाद शर्माले बताउनुभयो ।
सरकारबाट मन्त्रीपरिषद बैठकको निर्णय प्राप्त हुनासाथ आयोगको बैठक बसेर नयाँ कार्यतालिका निर्माण गर्ने शर्माले बताउनुभएको छ । जिल्ला र स्थानीय निकायमा स्थापना भएका निर्वाचन कार्यालयले भने आफ्नो काम जारी राख्ने आयोगले जनाएको छ ।
पुरानो कार्यतालिका अनुसार आगामी १९ गते उम्मेद्धवारी मनोनयन गर्नुपर्ने थियो । अब सो कार्यतालिका केहि पछि सर्ने भएको छ ।
