काठमाडौँ १५ जेठ । सरकारले आज सदनमा प्रस्तुत गरेको आव २०७४÷७५ को राजस्व र व्ययको वार्षिक अनुमान (बजेट) मा उद्यमी व्यवासायीले मिश्रित प्रतिक्रिया व्यक्त गरेका छन् ।
नेपाल उद्योग वाणिज्य महासङ्घका अध्यक्ष भवानी राणाले स्थानीय तहको विकास निर्माणका लागि पर्याप्त बजेट विनियोजन हुनु स्वागतयोग्य छ भन्दै स्थानीय तहमा प्रवाह हुने बजेटबाट विकासनिर्माणका आयोजना बन्ने र पुँजीगत खर्च बढ्ने हुनाले बजेटका उद्देश्य प्राप्ति हुनेमा आफू आशावादी रहेको बताउनुभयो । राष्ट्रिय गौरवका आयोजना निर्माणसँगै उत्पादनमूलक क्षेत्रको वृद्धिका लागि बजेटमा गरिएको व्यवस्थाको सराहना गर्दै उहाँले कार्यान्वयन पक्ष पनि सुदृढ र सबल हुनुपर्नेमा जोड दिनुभयो ।
नेपाल चेम्बर अफ कमर्सका अध्यक्ष राजेशकाजी श्रेष्ठले बजेट कार्यान्वयनका निम्ति स्रोतको स्पष्ट व्यवस्था बजेटमा नभएकाले कर नै राजस्वको मूल स्रोत हुने विश्लेषण सुनाउँदै उहाँले आय स्रोत वृद्धिका क्षेत्र बढाउनुपर्ने औँल्याउनुभयो ।
ग्रील तथा स्टिल व्यवसायी महासङ्घ नेपालका अध्यक्ष मोहन कटुवालले बजेट कार्यान्वयनमा सम्बद्ध सबै पक्षले इमान्दारी देखाउनुपर्ने बताउनुभयो ।
नेपाल समुद्रपार निकासी पैठारी सङ्घका अध्यक्ष शिवकुमार अग्रवालले बजेट सन्तुलित भए पनि सङ्घका केही माग आचारसंहिताका कारण बजेटमा समेटिन नसकिए पनि भविष्यमा राज्यले तिनलाई समेट्नेमा सङ्घ आशावादी रहेको बताउनुभयो । नेपाल अटोमोबाइल डिलर्स एसोसिएसनका अध्यक्ष अञ्जन श्रेष्ठले भन्सार दरमा परिवर्तन नहुनु स्वागतयोग्य रहेको बताउँदै राजस्वको दर होइन त्यसको दायरा वृद्धि गर्नुपर्छ भन्नुभयो । उहाँले समग्रमा उद्योग प्रोत्साहन गर्ने किसिमको बजेट आएको प्रतिक्रिया दिनुभयो । उहाँले भन्नुभयो, “२० वर्षे पुराना सवारी साधन हटाउने आयुको मापदण्डभन्दा सवारी साधन प्रदूषणमुक्त र सेवा दिन उपयुक्त छ ÷छैन भन्ने निक्र्योल गर्न आवश्यक छ ।”
युवा उद्यमी निर्वाण चौधरी समग्रमा बजेट सन्तुलित रहेको बताउनुहुन्छ । उहाँ भन्नुहुन्छ, “सडक यातायात, जलविद्युत् जस्ता भौतिक पूर्वाधारका साथै सामाजिक सुरक्षाका क्षेत्रमा बजेटमार्फत दिइएको प्राथमिकता स्वागतयोग्य छन् ।”
