काठमाडौं ,१५ जेठ ।
गएरातिदेखि स्थगित भएकाे भरतपुर महानगरपालिकाको मतगणना अघि बढाउने विषयमा निर्वाचन आयोगले आकस्मिक बैठक बाेलाएकाे छ । अाज विहान ९ बजे आयोगको कार्यालय कान्तिपथमा बस्ने बैठकले के गर्ने भन्ने विषयमा निर्णय गर्ने निर्वाचन आयोगले जनाएको छ ।
निर्वाचन आयोगका सचिव गोपीनाथ मैनालीले भरतपुर महानगरपालिकाको रोकिएको मतगणना सुचारु गर्न आकस्मिक बैठक बस्न लागेको बताउनुभयो । केहीबेरपछि बैठक बस्ने बैठकले भरतपुर महानगरपालिकाको प्रतिवेदन हेरेर उपयुक्त निर्णय गर्ने मैनालीले बताउनुभयो । ‘के भएको हो, अब के गर्न सकिन्छ भनेर छलफल गरेर उपयुक्त निर्णय गर्छौ’ उहाँले भन्नुभयो ।
भरतपुर महानगरपालिका निर्वाचन अधिकृतको कार्यालयले मतगणनाका क्रममा मतपत्र च्यातिएको भन्दै निर्वाचन आयोगको निर्देशन नआएसम्म मतगणना रोक्ने निर्णय गरेको छ ।सचिव मैनालीले भरतपुरको जानकारी पाएलगत्तै बैठक डाकिएको बताउनुभयो । ‘आज गणतन्त्र दिवस परेकाले साथीहरु गणतन्त्र दिवस मनाउन जानुभएको पनि होला तर हामी केहीबेरमै निर्णय गर्छौ’ उहाँले भन्नुभयो ।
