११ जेठ ,नुवाकोट ।
चुनावमा सहयोग नगरेको भन्दै काँग्रेसका एक पराजित उम्मेदवारले माओवादी केन्द्रकी स्थानीय महिला कार्यकर्तालाई कुटपिट गरेका छन् ।
नुवाकोटको किस्पाङ गाउँपालिका वडा नं १ भाल्चे नुचेत निवासी सञ्जुमाया घलेलाई नेपाली काङ्ग्रेस कार्यकर्ताले बुधबार मध्यरात कुटपिट गरेका हुन् । घरमा एक्लै भएको मौकामा सोही वडाबाट काँग्रेसका पराजित उम्मेदवार शुकबहादुर घलेको निर्देशनमा उक्त कुटपिट भएको माओवादी केन्द्रले बताएको छ ।
माओवादी केन्द्रको प्रचार गरेर अाफूलाई हराएको भन्दै शुकबहादुरले सञ्जुलाई पिट्न निर्देशनमा माओवादी केन्द्रका जिल्ला संयोजक हिरानाथ खतिवडाले बताएका छन् ।
काँग्रेस कार्यकर्ताहरुले सञ्जुमायको मुख, खुट्टा बाध्नुका साथै अाँखा र मुखमा पट्टी बाँधेर कुटपिट गरेका थिए । चुनावमा अाफूलाई सहयोग नगरेको भन्दै २४ वर्षीय सञ्जुमायालाई कुटपिट गरेपछि काँग्रेसलाई भोट नदिएका मतदाता अातंकित भएका छन् ।
