चितवन , ११ जेठ ।
भरतपुर महानगरपालिकाको मतपरिणाम अन्तिम चरणामा अाउदा एमालेका मेयर उम्मेदवार देवी ज्ञवाली र कांग्रेस–माओवादी गठबन्धनकी मेयर उम्मेदवार रेणु दाहालबीचको मत अन्तर घट्दै गएको हो।
पछिल्लो मत परिणाम अनुसार एमाले मेयर उम्मेदवार ज्ञवाली माओवादीकी मेयर उम्मेदवार दाहाल भन्दा १२ सय ३५ मतले अगाडि हुनुहुन्छ। देवी ज्ञवालीले ३२ हजार ५ सय २ मत ल्याउनुभएको छ भने रेणु दाहालले ३१ हजार २ सय ६७ मत ल्याउनुभएको छ।
उपमेयरमा कांग्रेसकी पार्वती शाहले ३४ हजार ९ सय २२ मत ल्याउनुभएको छ भने एमालेका दिव्या शर्माले २९ हजार ३ सय ६ मत ल्याउनुभएको छ।
निर्वाचन आयोगका अनुसार वडा नम्बर १ देखि १५ र २५ देखि २९ वडासम्मको मतगणना भइसकेको छ। अब भने १६ देखि २४ वडाको मतगणना भइराखेको छ।
उता, काठमाडौँ महानगरपालिकामा अब आठ वटा वडाको मात्र मतपरिणाम आउन बाँकी रहँदा नेकपा(एमाले) विद्यासुन्दर शाक्यले ५२ हजार ३९० मत प्राप्त गर्नुभएकाे छ । त्यसैगरी प्रमुख पदकै लागि नेपाली काँग्रेसबाट उम्मेदवारी दिएका राजुराज जोशीले ३६ हजार ९८१ मत ल्याउनु भएकाे छ ।
नेकपा (माओवादी केन्द्र)का सर्वोत्तम डङ्गोलले पाँच हजार ९७८, साझा पार्टीका किशोर थापाले १४ हजार ८६१ र विवेकशील पार्टीकी रञ्जु दर्शनाले १९ हजार २५६ मत प्राप्त गर्नुभएकाे छ ।
त्यस्तै उपप्रमुखका लागि काँग्रेसकी हरिप्रभा खड्गीले अग्रता कायम गरिरहेकी छन्।
उनले हालसम्ममा ४८ हजार १०१, राप्रपाका राजाराम श्रेष्ठले २८ हजार ४२०, माओवादी केन्द्रका सुशीला पौडेलले आठ हजार ५३ र साझा पार्टीकी निरुपमा यादवले नौ हजार ४७६ मत प्राप्त गरेको मुख्य निर्वाचन अधिकृत दीपेन्द्र अधिकारीले जानकारी दिए ।
एक लाख ७२ हजार ६८३ मत खसेकामा हालसम्ममा एक लाख ५९ हजार १७५ मत गणना भइसकेको छ । हालसम्ममा १३ वटा वडामा एमाले र ११ वडामा काँग्रेसले जित हासिल गरेका छन् ।
