काठमाडौँ, ९ जेठ ।
स्वयम्भूस्थित हलचोकमा आज भएको सवारी दुर्घटनामा नुवाकोट, विदुर नगरपालिकाका ५० वर्षीय चेतनाथ भट्टको मृत्यु भएको छ ।
ना ५ ख ४८९६ नं को भाडामा चल्ने सार्वजनिक यातायातले आज बिहान पौने ८ बजे नुवाकोट घर भई हाल स्वयम्भू बस्ने भट्टलाई ठक्कर दिएको थियो ।
गम्भिर घाईते उनको त्रिवि शिक्षण अस्पतालमा उपचारका क्रममा मृत्यु भएको महानगरीय ट्राफिक प्रहरी महाशाखाले जनाएको छ ।
महानगरीय प्रहरी वृत्त स्वयम्भूले चालक र सवारी साधनलाई नियन्त्रणमा लिएर अनुसन्धान गरिरहेको छ ।
यसैबीच गएराति ठमेल नजिकै गल्कोपाखामा भएको सडक दुर्घटनामा नौ वर्षका दीपेश विकको मृत्यु भएको छ ।
नुवाकोट शिवपुर गाउँपालिका–२ स्थायी घर भई हाल कपुरधारा बस्दै आएका विकलाई बा २ ज २३४५ नं को ट्याक्सीले ठक्कर दिँदा गम्भीर घाइते भएका उनको उपचारका लागि लैजाँदै गर्दा मृत्यु भएको हो ।
दुर्घटनामा संलग्न सवारीसाधन तथा चालकलाई महानगरीय प्रहरी वृत्त, लैनचौरले नियन्त्रणमा लिएको छ ।
