काठमाडौ, ८ जेठ ।
काठमाडौको बूढानीलकण्ठ नगरपालिकाको मेयरमा नेकपा एमालेका उद्धव खरेल विजयी हुनु भएको छ । खरेल कांग्रेसका राजु श्रेष्ठलाई ३,४१९ मतान्तरले पराजित गर्दै मेयरमा विजयी हुनु भएको हो ।
खरेलले १३,३९६ मत प्राप्त गर्नुभएको छ भने श्रेष्ठले ९,२२७ मत पाउनु भएको छ । उपमेयरमा पनि एमालेकै रमा राई विजयी हुनु भएको छ । यो सँगै काठमाडौ महानगरपालिका बाहेक काठमाडौंका सबै नगरको मतगणना सकिएको छ ।
काठमाडौंमा १ महानगरसहित अन्य १० नगरपालिका छन् । १० मध्ये एमालेले ६ वटामा मेयर जितेको छ भने कांग्रेसले ४ वटामा जित हात र्पायो । बूढानीलकण्ठसहित शंखरापुर, कागेश्वरी, टोखा, तारकेश्वर र कीर्तिपुरमा एमाले विजयी भएको छ ।
गोकर्णेश्वर, नागार्जुन, चन्द्रागिरि र दक्षिणकालीको मेयरमा भने कांग्रेसले जित हासिल गरेको छ । प्रमुख जितेका सबै नगरको उपमेयर पनि एमालेले नै जितेको छ ।
कांग्रेस विजयी भएका नागार्जुन र चन्द्रागिरिको उपमेयरमा पनि एमाले विजयी भएको छ । काठमाडौंमा माओवादी केन्द्रले भने प्रमुख पदमा कुनै पनि नगरमा जित हासिल गर्न सकेन ।
