नेकपा एमालेका तत्कालीन महासचिव मदन भण्डारी र संगठन विभाग प्रमुख जीवराज आश्रतिको ०५० साल जेठ ३ गते आजकै दिन चितवनको दासढुंग्ाामा दुर्घटनामा परी निधन भएको थियो । पोखराबाट गाडीमा चितवनतर्फ जाँदै गर्दा भण्डारी र आश्रति चढेको गाडी त्रिशुली नदीमा खसेको थियो ।
आफ्ना नेताहरुको निधन दुर्घटनाबाट नभई षडयन्त्रबाट गरिएको भन्दै त्यसबेला एमालेले आन्दोलन गरेको थियो ।तर, विभिन्न छानविनहरुले सो घटनालाई दुर्घटना मानेपछि एमालेले अहिले २४ वर्ष बित्दासम्म यो प्रकरणबारे कुनै अनुन्धान अघि बढाएको छैन । यसवीचमा सरकार पुग्दा पनि एमालेले दासढुंगा काण्डबारे बोलेको थिएन ।
तर, एमाले अध्यक्ष ओलीले बुधबार दासढुंगा काण्डलाई पुनः ठूला शक्तिले गराएको षडयन्त्रमूलक हत्याकाण्डको संज्ञा दिँदै यसको रहस्य पत्ता लगाउने उदघोष गर्नुभयाे । अाज २४ औं मदन स्मृति दिवस मनाइदै छ ।
दासढुंगा काण्डको ८ वर्षपछि ०५८ साल जेठ १९ गते राति भएको दरबार हत्याकाण्ड पनि अहिलेसम्म रहस्यकै गर्भमा छ । नारायणहिटी दरबारमा मध्यरातमा भएको गोलीकाण्डमा वीरेन्द्र राजाको बंश नाश भएको थियो । त्यसबेला पोखरामा रहेका तत्कालीन अधिराजकुमार ज्ञानेन्द्र शाहले ७ वर्षसम्म राजगद्दी सम्हालेपछि देशमा गणतन्त्र आएकाे थियाे ।
तत्कालीन युवराज दीपेन्द्रले दरबार हत्याकाण्ड मच्चाएको भनिए पनि जनमानसमा यो घटनालाई अहिलेसम्म षडयन्त्रकै रुपमा हेर्ने गरिएको छ । यही क्रममा बुधबार एमाले अध्यक्ष केपी ओलीले समेत दरबार हत्याकाण्डलाई पनि दासढुंगा काण्डजस्तै षडयन्त्रमूलक हत्याकाण्डको कोटीमा राखेर व्याख्या गर्नुभयाे ।
