काठमाडौँ, जेठ ३। यहि रफ्तारमा मतगणना भए काठमाण्डौ महानगरपालिकाको मत परिणाम आउन अझै चार महिना लाग्ने देखिएको छ ।
सोमबार मध्याह्न १२ बजेबाट सुरु भएको मतगणनामा हालसम्म जम्मा २३९८ मात्रै गनिएको छ ।
प्रतिघन्टा गनिएको मत ६७ मात्रै हो । जम्मा १,९३,००० मत खसेकोमा यहि रफ्तारमा गन्दा सम्पूर्ण मत गन्न २८८० घन्टा अर्थात् १२० दिन (४ महिना) लाग्ने हुन्छ ।
यही रफ्तारमा मत गनिए भदौको ३० गते अन्तिम रिजल्ट आउनेछ ।
तर मतगणनामा ढिलाइ भएपछि निर्वाचन आयोगको निर्देशनमा मुख्य निर्वाचन अधिकृत र निर्वाचन अधिकृतले मतगणना टोली बढाउँदै छन् । बुधबारबाट काठमाडौं महानगरपालिकाले पाँच टोली बनाएर मतगणना गर्दै छ । काठमाडौं महानगरका मुख्य निर्वाचन अधिकृत दीपेन्द्र अधिकारीका अनुसार मंगलबार तीन टोलीले मतगणना गरिरहेको थियो भने बुधबार दुई टोली थपिनेछ । ‘प्रक्रियागत अप्ठ्यारोले टोली थप गर्न समस्या भएको थियो, अब प्रक्रिया पूरा गरेर बुधबार दुई टोली थपिँदै छ,’ मुख्य निर्वाचन अधिकृत अधिकारीले भने । ललितपुर महानगरमा ५ समूहमा र भरतपुरमा तीन समूहमा मतगणना भइरहेको छ ।
सहमतिका आधारमा मतगणक टोलीको संख्या बढाउने अधिकार मुख्य निर्वाचन अधिकृत र निर्वाचन अधिकृतको क्षेत्राधिकारभित्र पर्छ । ‘उनीहरूले आवश्यकताअनुसार कर्मचारी थपेर गणना गर्न र गणकलाई भत्ता दिनेबारे कुरा भइसकेको छ,’ निर्वाचन आयोगका प्रवक्ता सूर्यप्रसाद शर्माले भने ।
आयोगका प्रवक्ता सूर्यप्रसाद शर्माले दलका प्रतिनिधिले अनावश्यक विवाद निकालेर मतगणना लम्ब्याउने गरेकाले सहयोग गर्न आग्रह गरिएको बताए ।-नयाँपत्रिकाबाट
