धादिङ, १ जेठ ।
दक्षिणी धादिङको बेनिघाट रोराङ गाउँपालिका–९ जोगिमारास्थित पिपलभन्ज्याङमा एमाले कार्यकर्ता लक्ष्मण चेपाङको हत्या भएको छ ।
पिलभन्ज्याङ स्थित निर्माणाधिन घरमा गएराति ३० वर्षीय चेपाङको हत्या गरि त्रिपाल र जस्तापाताले छोपेर राखिएको अवस्थामा शव भेटिएको प्रहरीले जनाएको छ । उनको लाई लठ्ठीले हानेर हत्या गरिएको प्रहरीको भनाई छ ।
स्थानीय तह निर्वाचनको मतदान गरेपछि घरको काम गरेर बसेका चेपाङलाई हानिएको लठ्ठी सोही स्थानमा रगत लतपतिएको अवस्थामा भेटिएको छ । सोही घरसँगै रहेको रेशम चेपाङको पसल फोरेर सामान लुटिएको स्थानिय प्रदीप श्रेष्ठले जानकारी दिएका छन् ।
केही दिनदेखि लक्ष्मण चेपाङ र उनका भाइलाई भोट नहालेमा मार्ने धम्की आइरहेकाले सोही आधारमा हत्या भएको मृतकका भाइ लालबहादुर चेपाङले बताएका छन् ।
यसैगरी मतदान सकिएपछि नीलकण्ठ नगरपालिका–५ देयरालीमा काँग्रेस र एमाले कार्यकर्ताबीच झडप हुँदा चार जना घाइते भएका छन् । प्रहरीका अनुसार घाइते हुनेमा एमालेका ४२ वर्षीय राजेन्द्र थापामगर, २५ वर्षीय ललितबहादुर थापामगर र १९ वर्षीय गणेशबहादुर थापामगर र नेपाली काँग्रेसका २४ वर्षीय रामबहादुर थापामगर रहेका छन् । घाइतेको जिल्ला अस्पतालमा उपचार भइरहेको छ ।
