दोलखा ,३१ बैशाख ।
दोलखाको तामाकोशी गाउँपालिका झुलेमा मतदानका क्रमममा कांग्रेस र एमाले कार्यकर्ताबीच झडप हुँदा ६ जना घाइते भएका छन् । घाइतेमध्ये अच्युत कार्कीको अवस्था गम्भीर रहेको प्रहरीले जनाएको छ ।
झुलेको अमर उच्च मावि केन्द्रमा मतदान भइरहेको समयमा नेपाली कांग्रेस र एमालेका कार्यकर्ताबीच झडप भएको दोलखाका सहयाक प्रमुख जिल्ला अधिकारी यज्ञराज बोहराले जानकारी दिनुभयो ।
घाइते सबैजनालाई थप उपचारको लागि जिल्ला अस्पताल चरिकोट लगिएको छ । यस्तै विवादका कारण विगु गाउँपालिकाको थम्पु मावि आलम्पुमा रोकिएको मतदान प्रक्रिया पुनः सुरु भएको बोहराले बताउनु भयो ।
उता मुगुको खत्याड गाउँपालिका–८ को सरस्वति प्राविमा मतदान भइरहेका बेला झडप भएको छ । मतदाता परिचयपत्र नल्याएका व्यक्तिले जबर्जस्ती मतदान गर्न खोज्दा झडप भएको जनाइएको छ ।
झडप लगत्तै स्थानिय बासिन्दाले ढुंगामुढा प्रहार गरेपछि प्रहरीले ५ राउण्ड हवाई फायर गरेको छ । हवाइ फायर भएपछि मतदान केहीबेर प्रभावित भएपनि अहिले मतदान फेरि सुरु भएको प्रहरी सहायक निरीक्षक चेतबहादुर खत्रीले जानकारी दिनुभयो ।
