काठमाडौं, बैशाख ३० ।
गएराति भएको इङ्गलिस प्रिमियर लिगअन्तर्गत भएको खेलमा वेष्ट ब्रोमलाई १ विरुद्ध शून्य गोलले पराजित गर्दै दुई खेल बाँकी हुँदै चेल्सीले उपाधि आफ्नो हातमा पार्न सफल भएको छ ।
चेल्सीलाई जित हात पार्न मिसी बात्सुईले खेलको अन्तिममा आएर गरेको गोल नै निर्णायक गोल साबित बनेको हो । अवे मैदानमा भएको खेलमा चेल्सी पहिलो हाफमा गोलरहित बराबरीमा रोकिएको थियो ।
दोश्रो हाफमा पनि गोल गर्न निकै संघर्ष गर्नु परेको थियो । तर, सबस्टिच्युडको रूपमा मैदान आएका बात्सुईले ८२ औँ मिनेटमा गोल गर्दै चेल्सीलाई उपाधि दिलाएका हुन् । चेल्सीले पछिल्लो तीन सिजनमा दोश्रो पटक लिगको उपाधि जितेको हो । उसले सन् २०१४ र ०१५ को सिजनमा पनि उपाधि जितेको थियो ।
गएको सिजन खराब प्रदर्शन गरेको चेल्सीले यो सिजन भने सुरुवातदेखि नै राम्रो प्रदर्शन गर्दै आएको थियो । लिगका दुई खेल बाँकी हुँदै उपाधि जितेको चेल्सीको ८७ अंक भएको छ भने दोश्रो स्थानमा रहेको टोटनह्यामको तीन खेल बाँकी हुँदा ७७ अंक रहेको थियो ।
