काठमाडौँ, २५ वैशाख ।
सभामुख ओनसरी घर्ती र अन्तरव्यवस्थापिका सङ्घ (आइपियु)का अध्यक्ष तथा बङ्गलादेशका सांसद सबेर होसाइन चौधरीबीच भेटवार्ता भएको छ ।
सभामुखको कार्यकक्ष सिंहदरबारमा आज भएको भेटवार्तामा दुईपक्षीय चासो र हितका विषयमा उहाँहरुबीच कुराकानी भएको थियो ।
नेपालको व्यवस्थापिका–संसद्मा भइरहेका काम र समसामयिक अवस्थावारे आइपियुका अध्यक्षले सभामुख घर्तीसँग चासो व्यक्त गर्नुभएको उहाँका प्रेस सल्लाहकार बबिन शर्माले जानकारी दिनुभयो ।
विश्वका केही देशमा संसद्लाई असजिलो पार्नेगरी काम भइरहेको उल्लेख गर्दै ती देशमा छिट्टै आइपियुले अध्ययन गरेर समस्या समाधानको पहल गर्ने बताउनुभयो ।
संसद्लाई अप्ठ्यारो पार्ने अवस्था सिर्जना भएमा आइपियु सधैँ संसद्को पक्षमा उभिने चौधरीले बताउनुभयो ।
सभामुख ओनसरी घर्तीले नेपालको समसामयिक अवस्थाबारे जानकारी गराउँदै केही दिनभित्रै स्थानीय तहको चुनाव हुन गइरहेको र यो चुनाव संविधान कार्यान्वयनका लागि महत्वपूर्ण रहेको बताउनुभयो ।
उहाँले बङ्गलादेश र नेपालको संसद् र सांसदबीचको सम्बन्ध अझ बलियो र बाक्लो बनाउनुपर्ने धारणा राख्दै बङ्गलादेशका सभामुखलाई नेपाल भ्रमणको निम्तोसमेत दिनुभएको छ ।
