म्याग्दी, बैशाख २३ ।
म्याग्दी जिल्लाको तीनवटा ग्रामीण बस्तीमा उपभोक्ता समितिद्वारा कुल लागतको ३५ प्रतिशत श्रमदान गरेर एकै साथ खानेपानी आयोजना निर्माण भएको छ ।
जिल्ला समन्वय समिति अन्तर्गत सञ्चालित दोस्रो चरणको पश्चिम नेपाल ग्रामीण खानेपानी तथा सरसफाइ परियोजनामार्फत निर्माण भएको थियो ।
अन्नपूर्ण गाउँपालिका– ६ घारमा बिरौटा, मङ्गला– २ तल्लो हिदीमा पात्लेपानी र मालिका– ४ ओखरबोटमा खालखोला खानेपानी तथा सरसफाइ आयोजना निर्माण भएको उक्त परियोजनाले जनाएको छ ।
एक करोड १६ लाख ७५ हजार एक सय ४५ रुपैयाँको लागतमा निर्माण भएको तीनवटा आयोजनाबाट एक सय १९ घरधुरीका सात सय ७३ जनसङ्ख्या लाभान्वित भएको परियोजनाका सल्लाहकार थरेन्द्र पौडेलले जनाएको छ ।
यसै महिना सञ्चालनमा आएका तिनवटै आयोजनामार्फत प्रभावित क्षेत्रका सबै उपभोक्ताको घरमा निजी धारा जडान भएको छ । परियोजना, जिल्ला समन्वय समिति र गाउँपालिकाको अनुदान सहयोगमा उपभोक्ताले श्रमदान गरेर आयोजना निर्माण गरेका हुन् ।
सार्वजनिक धारा र असुरक्षित मुहानको पानी खानेपानी उपभोग गर्दै आएका सर्वसाधारणको घरमै धारा जडान भएपछि समयको बचतसँगै दैनिकी सहज भएको बिरौटा खानेपानी तथा सरसफाइ आयोजनाका अध्यक्ष ठाकुर बरुवालले बताए ।
उनकाअनुसार पानीको मितव्ययी प्रयोग र आयोजनाको दिगो सञ्चालनका लागि मिटर जडान तथा मासिक न्युनतम शुल्क निर्धारण गरिएको छ । यस परियोजनामार्फत म्याग्दीमा थप अन्य चारवटा खानेपानी आयोजना निर्माणाधीन रहेका छन् ।
