काठमाडौं, बैशाख २३ ।
स्थानीय तहको निर्वाचनका लागि प्रचार प्रसार गर्ने क्रममा आज बिहान भरतपुर महानगरपालिकाको मेयरकी उम्मेदवार रेणु दाहालको गाडीमा आगजनी भएको छ । प्रहरीले जनाएअनुसार भरतपुरस्थित हाकिम चौकमा चुनावी प्रचारमा रहेको गाडीमा आगजनी भएको छ । अज्ञात समूहले आगजनी गरेको बताईए पनि विस्तृत विवरण भने आउन बाँकी रहेको छ ।
यसैबीच, धादिङमा एमाले उम्मेदवारको सवारी साधनमा गएराति अज्ञात समूहले आगजनी गरेको छ । धादिङको थाक्रे गाउँपालिका वडा नं. २ का वडाअध्यक्ष उम्मेदवार राजकुमार पौडेलको सवारी साधनमा अज्ञात समूहले आगजनी गरेको हो ।
घर अगाडि पार्किङ गरेर राखेको बा. ९ च ८९२९ नम्बरको गाडीको सिसा फुटाई आगजनी गरेको जिल्ला प्रहरी कार्यालय धादिङले जनाएको छ । गाडीमा कसले आगजनी गरेको हो भन्ने खुल्न सकेको छैन । घटनाबारे थप अनुसन्धान जारी रहेको प्रहरीले जनाएको छ ।
