काठमाडौं, बैशाख १७ ।
सङ्घीय मामिला तथा स्थानीय विकास मन्त्रालयअन्र्तगत केन्द्रीय पञ्जीकरण विभागले अनलाइनमार्फत व्यक्तिगत घटनाहरू दर्ता गर्ने काम तीव्र गतिमा सञ्चालन गरेको छ ।
विभागले जन्म, मृत्यु, बसाइँसराइँ, सम्बन्धविच्छेद र विवाह प्रणालीलाई व्यवस्थित बनाउनका लागि अनलाइनमार्फत घटनाहरू दर्ता गर्ने कामलाई तीव्रता दिएको विभागका महानिर्देशक अनिलकुमार ठाकुरले बताएका छन् ।
देशका सबै स्थानीय तहमा अनलाइनमार्फत व्यक्तिगत घटनाहरू दर्ता गर्नका लागि कर्मचारीलाई विभागले तालिम दिइरहेको छ । उनकाअनुसार स्थानीय तहमा रकम वितरण गर्न सहज होस् भनेर सबै रेकर्डहरू कम्युटरमार्फत राख्न सबै स्थानीय तहमा तालिम दिने काम गरिरहेको जनाएको छ ।
विभागले काठमाडौं उपत्यकाभित्र ललितपुर जिल्लाका तीन वटा गाउँपालिकामाबाहेक सबै वडा कार्यालयबाट अनलाइनमार्फत व्यक्तिगत घटनाहरू दर्ता गर्ने काम गरिरहेको छ । वि.सं २०७१ असोजमा स्थापित विभागले सोही वर्षको माघदेखि काठमाडौंमा अनलाइनमार्फत घटना दर्ताको काम सुरुआत गरेको थियो ।
विभागका महानिर्देशक ठाकुरले स्थानीय तहको संरचनासँगै सबै नगरपालिका तथा वडामा सेवा दिन यहीँ बैशाखदेखि तीव्र गतिमा काम गरिएको छ भने हालसम्म छ सय ८७ वटा कार्यालयमार्फत उक्त काम भइरहेको बताए ।
विभागले सबै महानगरपालिकालाई आगामी जेठ मसान्तभित्र व्यक्तिगत घटनाहरूलाई अनलाइनमार्फत सञ्चालन गर्न निर्देशनसमेत दिइसकेको छ । यस्तै उपमहानगरपालिका, नगरपालिका र गाउँपालिकाको केन्द्रीय कार्यालयमार्फत जेठ १५ सम्म सेवा दिन निर्देशन दिइएको छ ।
