काठमाडौ १५ वैशाख ।
महानगरीय ट्राफिक महाशाखाले काठमाडौं उपत्यकाको बढ्दो सवारी चाप व्यवस्थित गरी दुर्घटना न्यूनीकरण गर्न चेतनामूलक कार्यक्रम सञ्चालन गर्ने भएको छ ।
महाशाखाले राजधानीमा आज आयोजना गरेको कार्यक्रममा महानगरीय प्रहरी आयुक्तको कार्यालयका निमित्त प्रहरी आयुक्त प्रहरी नायव महानिरीक्षक बमबहादुर भण्डारीले पैदलयात्रुको सुरक्षाका लागि चेतनमूलक कार्यक्रम सञ्चालन गर्ने जानकारी दिनुभयो ।
ट्राफिक प्रहरीले पैदल यात्रुलाई जेब्रा क्रसिङ र आकासे पुलबाट मात्र बाटो काट्न आग्रह गरेको छ ।
महानिरीक्षक भण्डारीले सवारी चालकलाई जेब्रा क्रसिङ खाली भए पनि ३० सेकेन्ड सवारी रोकेरमात्र अघि बढ्न आग्रह गर्नुभयो । उहाँले जेब्रा क्रसिङमा सवारी नरोक्ने चालकलाई कारवाही गर्ने पनि चेतावनी दिनुभयो ।
यसैगरी आकाशे पुल र जेब्रा क्रसिङ प्रयोग नगरी जथाभावी बाटो काट्ने पैदल यात्रुलाई पनि कारवाही गर्ने उहाँको भनाइ थियो । राजधानीमा सवारी साधनमा हर्न निषेध गरिएपछि ध्वनि प्रदूषणमा कमी आएको भन्दै ट्राफिक प्रहरीले त्यसमा सहयोग गर्न सबैलाई आग्रह गरेको छ ।
कार्यक्रममा ट्राफिक प्रहरी निरीक्षक सिताराम हाछेथुले तयार पारेको चेतनामूलक श्रव्यदृश्य देखाइएको थियो ।
