इटहरी, बैशाख १४ ।
आमाको मुख हेर्ने दिन अर्थात औँशीको दिन छोरीले आमाको मुख हेर्न आउला र रमाईलो गरौँला भनेर आशामा बसेकी एक आमाकी सन्तान आफूबाट सधैँका लागि टाढा गएपछि त्यो परिवारमा के बित्ला ? सोच्न कठिन छ तर, दैव संजोग नियतीले त्यस्तै खेल खेल्याे ।
सुनसरीको बराह नगरपालिका–१ निवासी पूर्ण तामाङकी नौ वर्षीया छोरी प्रकृति तामाङ बुधबार दिउँसो साढे २ बजेतिर सप्तकोशी नदीमा नुहाउने क्रममा बगेर बेपत्ता भएपछि खोजतलास गर्ने क्रममा करिब सवा ४ बजेतिर बगेको स्थानदेखि दुई सय मिटर दक्षिणमा मृत अवस्थामा फेला परेको जिल्ला प्रहरी कार्यालय सुनसरीले जानकारी दिएको छ ।
नदीमा साथीहरूसँगै नुहाउने क्रममा बगेकी बालिकाको लासलाई ईलाका प्रहरी कार्यालय महेन्द्रनगरको प्रहरी टोलीले मृत अवस्थामा फेला पारेर उनको शव परीक्षणका लागि बिपी कोइराला स्वास्थ्य विज्ञान प्रतिष्ठान पठाइएको पनि जिल्ला प्रहरी कार्यालयले जानकारी दिएको छ ।
घटनाका विषयमा प्रहरीले स्थानीयबासीसँग सोधखोज एवं अनुसन्धान जारी राखेको पनि ईलाका प्रहरी कार्यालयले जनाएको छ ।
