काठमाडौं, बैशाख १२ ।
राष्ट्रिय मुस्लिम संघर्ष गठबन्धनले सरकारले यसअघि गरेका सम्झौता कार्यान्वयन नगरेको भन्दै पुनः सरकारको ध्यानाकर्षण गराएका छन् ।
आज राजधानीमा एक पत्रकार सम्मेलनको आयोजना गरी मुस्लिम समुदायसँग गरिएका सम्झौता कार्यान्वयन गर्न आग्रह गरेको हो ।
गठबन्धनले राष्ट्रिय सभाको विशेषाधिकारका रूपमा सरकारले छुट्याएको अल्पसंख्यक, दलित र विभिन्न जातजातिका लागि आरक्षित कोटामा मुस्लिम समुदायलाई बेवास्ता गरेको आरोप गठबन्धनले लगाएको छ ।
सरकारले राष्ट्रियसभाको विशेषाधिकारअन्तर्गत २१ सदस्य विभिन्न प्रदेशबाट प्रतिनिधित्व हुने गरी दलित र अल्पसंख्यकका लागि छुट्याएको छ ।
जेठ १३ गतेदेखि मुस्लिम समुदायको एक महिने मुख्य पर्व रामजानको रोजा ब्रत शुरु हुने भएकाले दोस्रो चरणको निर्वाचन कार्यतालिका हेरफेर गर्न सरकारसँग गठबन्धनले आग्रह गरेको हो । व्रतको समयमा निर्वाचनमा मुस्लिम समुदाय उम्मेद्वार बन्न र मत हाल्न बन्चित हुने गठबन्धनको भनाई छ ।
