काठमान्डौं बैशाख १२ ।
प्रमुख प्रतिपक्षी एमालेले आजको ब्यावस्थापिका संसद बैठक अबरुद्ध गरेको छ ।
निर्वाचनको मिति घोषणा भइसकेपछि स्थानीय तहको संख्या बढाउन खाजेको भन्दै एमालेले संसद बैठक अवरुद्ध गरेको हो ।
स्थानीय तह पुर्नसंरचना आयोगको प्रतिवेदन खण्डित हुने गरी विभिन्न जिल्लामा कोटा बाडेर परिपत्र गरेको एमालेको आरोप छ ।
आजको बैठक सुरुहुनेबित्तिकै समय लिएर बोल्दै एमाले सांसद गंगालाल तुलाधरले स्थानीय तहको संख्या बढाउन खाजेको विषयमा सम्बन्धित मन्त्रीले जवाफ नदिएसम्म संसद चल्न नदिने बताएपछि एमाले सासंसदहरु आ–आफ्नो स्थानमा उभिएर विरोध जनाएका थिए ।
उहाँले संघीय मामिला तथा स्थानीय विकास मन्त्रालयले केही जिल्लामा स्थानीय तहको संख्या बढाउन परिपत्र गरेको विषय सदनलाई जानकारी गराउन माग गर्नुभयो ।
सभामुख ओनसरी घर्तीले प्रतिपक्षी दलका सांसदलाई बस्न आग्रह गरेपनि सम्बन्धित मन्त्रीले जवाफ नदिएसम्म संसद चल्न नदिने अडान लिएपछि बैठक १५ मिनेटका लागि स्थगित भएको छ ।
आजको बैठकमा सरकारले हिजो सदनमा पेश गरेको दोस्रो संविधान संशोधनका विषयमा सैद्धान्तिक छलफल गर्ने कार्यसुची थियो ।
