काठमाडौं १२ बैशाख, ।
शुल्क वृद्धिको विरोधमा विभिन्न विद्यार्थी संगठनहरुले आज मुलुकभरका जिल्ला शिक्षा कार्यालय अगाडि विरोध प्रदर्शन सहित धर्ना कार्यक्रम गर्दै छन् ।
निजी शैक्षिक संस्थाहरुले नियमविपरित चर्को शुल्क लिएको भन्दै विभिन्न ९ विद्यार्थी संगठनले विहान १० देखि ११ बजेसम्म एक घण्टा शिक्षा कार्यालय घेराउ गर्ने भएका हुन् । संयुक्त विद्यार्थी संगठनले नीजी विद्यालयमा तालाबन्दी लगायतका आन्दोलनका कार्यक्रम गर्ने पनि जनाएका छन् ।
सो विषयमा सरकारको ध्यानाकर्षण गराए पनि बेवास्ता गरेकाले आफूहरु आन्दोलनमा उत्रिन बाध्य भएको अनेरास्ववियुका सचिव आरसी लामिछानेले बताउनुभयो ।
विद्यार्थीको घोषित कार्यक्रम अनुसार भोली चर्को शुल्क लिने निजी विद्यालयहरुको लेखा र प्रशासन शाखामा तालाबन्दी गरिने र पर्सी १४ गते प्याब्सन र एन प्याब्सनको जिल्ला तथा केन्द्रीय कार्यालयमा तालाबन्दी गर्ने लगायतको आन्दोलनका कार्यक्रम सार्वजनिक गरेका छन् ।
यसअघि मापदण्ड विपरित संस्थागत विद्यालयले बढाएको शुल्क तीन दिन भित्र फिर्ता गर्न शिक्षामन्त्रालयले पहल गर्ने प्रतिबद्धता जनाएपनि कार्यान्वयन गर्न नसकेको उनीहरुले आरोप लगाएका छन् ।
