काठमान्डौं, बैशाख १२ ।
व्यवस्थापिका संसदको बैठक आज पनि बस्दै छ । बैठक नयाँवानेश्वर स्थित संसद भवनमा दिउसो १ बजेका लागि बोलाइएको छ ।
आजको बैठकमा सरकारले हिजो सदनमा पेश गरेको दोस्रो संविधान संशोधनका विषयमा सैद्धान्तिक छलफल गर्ने संसद सचिवालयले जनाएको छ ।
राष्ट्रिय जनता पार्टी र संघीय समाजवादी फोरम सहितका तराइ केन्द्रित दलको माग संबोधन गर्न सरकारले पेश गरेको संशोधन विधेयक माथि आज देखि सैद्धान्तिक छलफल हुन लागेको हो ।
सदनले सो संशोधन विधेयक माथि विचार गरियोस भन्ने प्रस्ताव पारित गरेपछि सांसदहरुले संशोधनका लागि ७२ घण्टाको समय पाउने छन् । उक्त समयमा सत्ता पक्षका प्रमुख सचेतक मार्फत सरकारले तराई केन्द्रित दलसँग गरेको संशोधन प्रस्तावमा परिमार्जन गर्ने तयारी गरेको छ ।
सरकार र मधेश केन्द्रीत दलहरुबीच भएको सहमतिको प्रमुख प्रतिपक्षी एमालेले भने बिरोध गरेको छ । दोस्रो संविधान संशोधन विद्येयक यसभन्दा भन्दा पनि खतरनाक भएको भन्दै आजको संसद बैठक अवरुद्ध गर्ने एमाले नेताहरुले बताएका छन् ।
