काठमाडौं, बैशाख ५ ।
क्यान्सरका बिरामीको उपचारका लागि सरकारले पाँच लाख रुपैयाँ सहयोग गर्ने स्वास्थ्यमन्त्री गगन थापाले बताएका छन् । त्यसैगरी काठमाडौंस्थित बागबजारका एक दम्पतिले क्यान्सर अस्पताल निर्माणका लागि चार करोड रुपैयाँ दान सहयोग पनि गरेका छन् ।
सोमबार काठमाडौं बागबजारका ८८ वर्षीय चिनिकाजी र पत्नी शान्तादेवीको ४ करोड सहयोगमा क्यान्सर अस्पतालमा शय्या थप गरिएको हो ।
स्वास्थ्यमन्त्री गगन थापाले सोमबार आयोजित कार्यक्रममा निवासी श्रेष्ठ दम्पतीको ४ करोड सहयोग र अन्य दाताबाट संकलित ९० लाखमा निर्माण भएको स्मृति भवन उद्घाटन गरेका छन् । उनले क्यान्सरका बिरामीको उपचारका लागि सरकारले पाँच लाख रुपैयाँ सहयोग गर्ने तयारी गरेको बताए । सरकार सबै नागरिकको स्वास्थ्य बिमा गरी क्यान्सर, मिर्गौला, मुटु रोग जस्ता जटिल प्रकृतिका रोगको निःशुल्क उपचार गर्ने विधेयक तयार गरी संसद्बाट पारित गर्ने अवस्थामा रहेको उनले बताए ।
देशभरका क्यान्सरका बिरामीलाई गुणस्तरीय सेवा पुर्याउँदै आएको अस्पताललाई दाता र सरकारी सहयोग वृद्धि गराउँदै अझै सेवा विस्तार र विकास गर्नुपर्ने कुरामा जोड दिए ।
