भक्तपुर, बैैशाख ४ ।
भक्तपुरको प्रसिद्ध जात्रा बिस्केट जात्राको आज आठौँ दिन सगुन जात्रा अर्थात द्यो सगं पूजा गरिएको छ ।स्थानीय बासिन्दाले आज बिहानैदेखि धिमे बाजा, बाँसुरी बाजा र भजन खलकहरूले भक्तपुर नगरका शक्ति पीठ तथा देवी–देवताको परिक्रमा गरी सगुन जात्रा मनाएका हुन् ।
जात्रामा स्थानीय महिला तथा पुरुष परम्परागत मौलिक पहिचान बोकेको नेवारी पोसाक हाकुपटासी र दौरा–सुरुवाल लगाएर जात्रामा सहभागी जनाएका थिए ।
आजै देवी–देवतालाई सगुन पूजा गर्न आ–आफ्ना देउता घर अर्थात नेपालभाषामा द्यः छेँबाट निकाली चोक तथा डबलीमा राखिएको थियो । जात्रामा सहभागी हुनेहरूले देवी–देवतालाई आ–आफ्ना गच्छेअनुसारका परिकार चढाएका थिए ।
सो पूजा प्राचिनकालदेखि नै सञ्चालन हुँदै आएको इतिहासमा उल्लेख गरिएको छ । बिस्केट जात्राका क्रममा बिघ्नबाधा वा केही भुलचुक भए माफी होस् भन्ने उद्देश्यका साथ नगरका शक्तिशाली देवी–देवताको मन्दिरमा पूजाआजा गर्ने प्रचलनलाई सगुन जात्राका रूपमा लिने गरिएको र यसलाई नेवारी भाषाको वंशावलीमा समेत उल्लेख भएको संस्कृतिविद् ओम धौभडेलले बताए ।
