भक्तपुर, बैशाख ३ ।
भक्तपुर नगरपालिकाको सल्लाघारीमा चैत्र २२ गतेदेखि १२ दिनसम्म सुरु भएको तेश्रो औद्योगिक, सांस्कृतिक, पर्यटन तथा व्यापार मेलामा १० करोड रुपैयाँ बराबरको कारोबार भएको छ ।
औद्योगिक शान्ति नेपालद्वारा आयोजित सो व्यापार मेलामा चार लाख मानिसले अवलोकन गरेको आज आयोजित समापन कार्यक्रममा संस्थाका अध्यक्ष सन्दीप महतले जानकारी दिएका छन् ।
उपभोक्तालाई एकै थलोबाट सम्पूर्ण सामान उपलब्ध गराउने उद्देश्यले दुई सय २५ स्टल राखिएको मेलामा दैनिक चर्चित कलाकारको साङ्गीतिक प्रस्तुति एवं सामानमा ४० प्रतिशतसम्म छुट दिएकाले उपभोक्ताको घुइँचो लागेको आयोजक संस्था मध्यपुर ब्वाइज ब्याण्डका सुनिल बज्राचार्यले जानकारी दिए ।
मेलामा सयभन्दा बढी राष्ट्रिय तथा स्थानीय कलाकारले हाँश्यव्यङ्ग्य, प्रहसन, गीत, नृत्य, जादुगरलगायत प्रस्तुतिका साथै नृत्य प्रतियोगिता सञ्चालन गरिएकै कारण पनि सहभागीको उत्साहजनक सहभागिता रहेको मेलाका संयोजक दीपक थापाले जानकारी दिए । मेलामा दैनिक उपभोग्य सामग्री, विभिन्न प्रकारका लत्ताकपडा, जुत्ता, कृषि तथा हस्तकलाका सामग्री, भाँडाकुँडाका सामग्री, पर्यटन प्रबद्र्धन गर्ने स्टल, खेल सामग्री, अटोमोबाइल, राष्ट्रिय तथा स्थानीय खाना महोत्सव, विभिन्न ब्राण्डका मोबाइल, इलेक्ट्रोनिक्सलगायत सामानको स्टलहरू राखिएको थियो ।
