नेपालगन्ज, बैशाख ३ ।
नयाँ वर्ष बैशाख महिनाको सुरुआतसँगै बढेको गर्मी र चलेको तातो हावाले सरुवा रोगका बिरामीको चाप पनि अस्पतालमा बढ्न थालेका छन् ।
३८ डिग्री सेल्सियसको आसपासमा रहेको तापक्रमका कारण बाँके जिल्लाको जनजीवन प्रभावित बन्दै गएको छ ।
धेरै गर्मी र दिउँसो चल्ने हल्का तातो हावाका कारण जिल्लावासी अत्यन्त आवश्यक कामकाजबाहेक बिहान र बेलुका घरबाट बाहिर निस्कँदैनन् । गर्मी बढ्दै गएपछि सरकारी तथा गैरसरकारी कार्यालयमा सेवाग्राहीको उपस्थितिसमेत पातलिएको तथा बजारमा चिसो पेय पदार्थ तथा खाद्य पदार्थको बिक्री ह्वात्तै बढेको छ ।
जिल्लाको भेरी अञ्चल अस्पताल, नेपालगन्ज तथा कोहलपुर शिक्षण अस्पतालमा दैनिक सरदर ३५÷४० जना विभिन्न सरुवा रोगका बिरामी उपचार गर्न आउने गरेको जनाइएको छ । यस वर्षको गर्मीयाम सुरु भएयता बाँके जिल्लामा पानी पर्न सकेको छैन ।
