कञ्चनपुर, बैशाख ३ ।
कञ्चनपुरको शुक्लाफाँटा नगरपालिका–३ पिपलाडीका ३० वर्षीया कौशा धामी बजारमा किनमेल गर्न गएका बेला रहस्यमय तरिकाले बेपत्ता भएकी छन् ।
सिलाइ मेसिन खरिद गर्नका लागि भारतीय बजारतर्फ गएकी धामी बेपत्ता भएकी हुन् । चैत्र २५ गते बजारतर्फ गएकी उनी घर नफर्केपछि परिवारजनले सबैतिर खोज्दासमेत फेला पार्न सकेका छैनन् ।
राहदानीको प्रतिलिपि घरभित्र फेला परेकाले दलालले प्रलोभनमा पारेर भारततर्फ लगेको हुन सक्ने आशङ्का परिवारजनले गरेका छन् ।
धामी बेपत्ता भएपछि इलाका प्रहरी कार्यालयमा खोजी कार्यका लागि निवेदन दिइएको उनका जेठाजु धनबहादुर धामीले बताएका छन् । ‘आफन्त र सम्भावित सबै क्षेत्रमा खोजी कार्य गर्दा पनि फेला पार्न नसकेपछि प्रहरीलाई गुहारेका छौँ’ उनले भने ।
तीन छोरीकी आमा धामी झलारी बजारमा सिलाइ पसल सञ्चालन गर्दै आएकी थिइन् । भारतमा रोजगारीका लागि गएका उनका श्रीमान् पनि चार वर्षदेखि बेपत्ता रहेका छन् । चेलीबेटी बेचबिखन विरुद्धमा क्रियाशील सङ्घसंस्थालाई समेत धामीका परिवारले खोजी कार्यका लागि सहयोग गरिदिन आग्रह गरेका छन् ।
