काठमाडौं चैत्र ३१ ।
निर्वाचन आयोगले स्थानिय तह निर्वाचनका लागि ७५ वटै जिल्लामा मुख्य निर्वाचन अधिकृतको कार्यालय स्थापना गर्ने तयारी गरेको छ ।
केन्द्रिय स्तरमा जारी प्रशिक्षण तालिमको आज समापन गरेपछि प्रकृया पुरा गरी आगामी ३ गतेबाट सबै जिल्लामा मुख्य निर्वाचन अधिकृतको कार्यालय स्थापना गर्ने आयोगले जनाएको हो ।
उम्मेदवारी दर्ता गर्ने दिन नजिकिदै जाँदा केन्द्रिय स्तरको तयारी पूरा गर्दै क्षेत्रिय स्तरमा प्रशिक्षण तालिम सञ्चालन गर्ने आयोगका सूचना अधिकृत नारद गौतमले जानकारी दिनुभयो । आयोगले ३ गते भित्रै सम्पूर्ण स्थानिय तहको मतदानकेन्द्र र मतदाताको अन्तिम नामावली सार्वजनिक गर्ने तयारी समेत गरेको छ ।
यस्तै नयाँ बर्षको सुरुवातसंगै करीब २१ हजार केन्द्रमा मतदाता शिक्षा अभियान सुरु गर्ने समेत आयोगले जनाएको छ । केन्द्रिय स्तरमा प्रशिक्षणमा सहभागी भएका अधिकृतले अगामी २ गतेबाट स्थानिय तहमा प्रशिक्षण दिनेछन् ।
