काठमाडौँ, २९ चैत ।
प्रधानमन्त्री पुष्पकमल दाहालले स्थानीय तहको चुनावले जनतालाई अधिकारसम्पन्न गराउने बताउनुभएको छ ।
चन्द्रागिरि महोत्सवको आज शुभारम्भ गर्दै उहाँले स्थानीय तहको चुनावपछि मुलुक समृद्धितर्फ उन्मुख हुने भएकाले सबै पक्षलाई सहयोग गर्न आग्रह समेत गर्नुभयो ।
चुनावपछि स्थानीय तहमै संगठितरुपमै कार्यपालिका, न्यायपालिका र व्यवस्थापिकाका अधिकार आउने भएकाले यो निर्वाचन धेरै महत्वपूर्ण रहेको उहाँको भनाई छ ।
प्रधानमन्त्री दाहालले चन्द्रागिरीको राजनीतिक परिवर्तनमा महत्वपूर्ण भूमिका रहेको बताउँदै काठमाडौंको गेटका रुपमा रहेको चन्द्रागिरीको विकासमा सरकारको ध्यान जाने बताउनु भयो ।
उहाँले कलंकीदेखि थानकोट हुँदै नागढुंगासम्मको सडक सिघ्र निर्माण गर्न सम्वन्धित निकायलाई निर्देशन दिने पनि प्रतिबद्धता जनाउनु भएको छ ।
नगरपालिकाका कार्यकारी अधिकृत कृष्णप्रसाद जैसीले त्यस क्षेत्रको प्राचीन महत्वका सम्पदास्थल, स्थानीय उत्पादनलगायतलाई प्रवद्र्धन गर्न सो महोत्सव गरिएको जानकारी दिनुभयो ।
स्थानीयवासी एवम् उद्यमी देवेन्द्र प्रधानले काठमाडौँ उपत्यकाभित्र प्रवेश गर्ने महत्वपूर्ण नाका भएको उक्त क्षेत्रमा शिक्षा, स्वास्थ्यको अवस्था सन्तोषजनक नरहेकाले त्यसतर्फ सरकारले लगानी अभिवृद्धि गर्नुपर्नेमा जोड दिनुभयो ।
आगामी वैशाख ६ गतेसम्म चल्ने महोत्सवमा नेवारी खाना र स्थानीय तहमा उत्पादन भएका खाद्य वस्तुको बिक्रीसमेत सुरु गरिएको छ । आधुनिक नेपालका निर्माता पृथ्वीनारायण शाहले चन्द्रागिरिको डाँडाबाट अवलोकन गरी काठमाडौँ खाल्डोसमेत जिती विशाल नेपाल बनाएको बताइएको छ । त्यस क्षेत्रमा कालु पाँडेको समाधि, इन्द्र दहलगायत स्थान पर्छन् ।
