काठमान्डौ चैत्र २९ ।
डिआईजी नवराज सिलवालले आज सर्वोच्च अदालतमा दोस्रो रिट दर्ता गर्नु भएको छ । प्रहरी महानिरीक्षक आईजीपीमा प्रकाश अर्याललाई गरेको नियुक्त बदर र यसअघि सर्वोच्च अदालतले गरेको निर्णय कार्यान्वयनको माग राख्दै उहाँले दोस्रो रिट दर्ता गर्नु भएको हो ।
सरकारले हिजो आईजीपीमा डिआईजी अर्याललाई नियुक्त गरेको थियो । उहाँलाई गएराति नै महानिरीक्षकको दज्र्यानी चिन्ह प्रदान गरिएको छ । डिआईजी सिलवाल कार्यसम्पादन मूल्यांकनको फाइलमा झेल भएको भन्दै असन्तुष्ट रहनु भएको छ ।
सिलवालले कार्यसम्पादन मूल्यांकनको फाइलमै दुई नम्बर घटाएर आफूलाई पछि पारिएको दाबी गर्नु भएको छ । यसअघि सरकारले गत फागुन १ मा डीआईजी जयबहादुर चन्दलाई महानिरीक्षक नियुक्त गरेकामा तीन साताअघि सर्वोच्च अदालतले उक्त निर्णय उल्ट्याइदिएको थियो ।
सर्वोच्चले कार्यसम्पादन मूल्यांकन ख्याल नगरी मन्त्रिपरिषद्ले महानिरीक्षक नियुक्ति गर्नु विधिसम्मत नभएको भन्दै कार्यसम्पादनका आधारमा पुनः नियुक्ति गर्न चैत ८ गते आदेश दिएको थियो ।
