काठमाडौँ, २७ चैत ।
नेपाल विद्युत् प्राधिकरणका कार्यकारी निर्देशक कुलमान घिसिङले कालीगण्डकी जलविद्युत् आयोजनाको मर्मत सम्भारको काम १० दिनभित्र सम्पन्न गर्न निर्देशन दिनुभएको छ ।
विद्युत्भार कटौतीलाई अन्त्य गर्न महत्वपूर्ण मानिएको सो आयोजनाको मर्मत सुरु भएको दश दिन भइसक्दा पनि नसकिएकाले कार्यकारी निर्देशक घिसिङले अबको दश दिनमा मर्मत गरी पूर्ण क्षमतामा आयोजना सञ्चालन गर्न निर्देशन दिनुभएको हो । मुलुकको प्रमुख ‘पावर ब्याङ्क’को रुपमा रहेको उक्त आयोजना एक सय ४४ मेगावाट क्षमताको रहेको छ ।
दुई वटा युनिटबाट नियमित रुपमा ९६ मेगावाट विद्युत् उत्पादन भइरहेको छ । कालीगण्डकी जलविद्युत् आयोजनाको मर्मतरसम्हार छिटो गराउने उद्देश्यले प्राधिकरणका कार्यकारी निर्देशक घिसिङ स्थलगत अवलोकनका लागि आयोजना स्थल पुग्नुभएको प्राधिकरणले जनाएको छ ।
निर्देशन अनुसार काम भए नभएको अवलोकन गर्न उहाँ आयोजनास्थल पुग्नुभएको हो । कालीगण्डकी आयोजनामा ४८ मेगावाटका तीन वटा टर्वाइन मध्ये एउटा टर्वाइनको मर्मत भइरहेको छ । साँझको समयमा मात्रै आयोजना सञ्चालन हुने भएकाले सो आयोजनालाई ‘पावर ब्याङ्क’को रुपमा लिने गरिन्छ ।
आयोजनाको उपयोग र उचित व्यवस्थापन गरेर नै मुलुकभर विद्युत्भार कटौती अन्त्य गराउन सफलता प्राप्त भएको हो । प्राधिकरणको प्रवद्र्धनमा कालीगण्डकी आयोजना विगत १४ वर्षखेखि सञ्चालनमा छ ।
