काठमाडौं, चैत २७।
झण्डै एक महिनापछि आजका लागि बोलाइएको मन्त्रिपरिषदको बैठक अचानक स्थगित गरिएको छ । उपप्रधानमन्त्रीहरुको वरीयता विवादका कारण गत चैत ३ गतेदेखि मन्त्रिपरिषदको बैठक बस्न सकेको छैन ।
संविधान संशोधनको नयाँ विधेयकमा मधेशी मोर्चासँग सहमति हुन नसकेपछि बैठक भोलि अपरान्ह तीन बजे सम्मका लागि स्थगित गरिएको जनाइएको छ ।
तर प्रधानमन्त्री पुष्पकमल दाहालले कमल थापालाई पहिलो वरीयता दिने संकेत पाएपछि अर्का उपप्रधानमन्त्री विमलेन्द्र निधि विराटनगर गएको र सोही कारण बैठक रोकिएको बुझिएको छ ।
उपप्रधानमन्त्रीद्वय कमल थापा र विमलेन्द्र निधिमध्ये कसलाई पहिलो वरीयता दिने भन्ने विवादका कारण सरकार नै निष्क्रिय अवस्थामा पुगिसकेको छ । जसका कारण सर्वोच्च अदालतले परमादेश जारी गर्दा समेत नेपाल प्रहरीमा महानिरीक्षक नियुक्ति हुन सकेको छैन भने कैयौं महत्वपूर्ण निर्णयहरु रोकिएका छन् ।
मन्त्रिपरिषद बैठक बस्न नसक्दा सर्वोच्च अदालतको आदेश अनुसार प्रहरी प्रमुख नियुक्त हुन सकेको छैन भने कैयौं महत्वपूर्ण कामहरु अघि बढ्न सकेका छैनन् ।
