काठमाडौं, चैत्र २७ ।
चीन सरकारको अनुदानबाट प्राप्त विद्युतीय चुलो (इण्डक्सन चुलो) बिक्री वितरण र त्यसको समाधान विषयलाई लिएर आज राजधानीमा एक अन्तरक्रिया कार्यक्रमको आयोजना गरिएको छ ।
सो कार्यक्रममा बोल्दै ललितपुर क्षेत्र नं. २ का सभासद् चन्द्र महर्जनले भारतद्वारा अघोषित रूपमा गरिएको नाकाबन्दीका क्रममा चीन सरकारले अनुदानको रूपमा दिएको विद्युतीय चुलोको मूल्यमा विवाद हुँदा भन्सारमा त्यत्तिकै राख्नु पर्दा नेशनल ट्रेडिङ लिमिटेड घाटा सहेर बस्नुपर्ने बाध्यतालाई समाधान गर्नतिर अग्रसर हुनुपर्नेमा जोड दिएका छन् ।
चीन सरकारबाट पहिलो पटक १०,००० र पछिल्लो समय एक हजार तीन सय वटा विद्युतीय चुलो आयात भएको थियो । जसको मूल्य साढे १३ सयदेखि साढे चार हजार मूल्यमा बिक्री गर्ने निधो गरिएको थियो । तर, हाल आएर सो चुलोको ११ हजार नौ सय ९५ मूल्य तोकिएपछि यस विषयमा थप विवाद भएको थियो । तर उक्त मूल्य सर्वसाधारणलाई सहज हुनेगरी मूल्य निर्धारण गर्नुपर्नेमा सहभागी वक्ताहरूले आ–आफ्नो धारणा व्यक्त गरेका छन् ।
बैठकमा कार्यक्रमका संयोजक सुभाषचन्द्र ठकुरी, आपूर्ति मन्त्रालयका निमित्त सचिव, अर्थमन्त्रालयका उप–सचिवलगायतको उपस्थिति रहेको थियो ।
