काठमाडौं, चैत्र २५ ।
नेपाल वायुसेवा निगम (नेवानि)ले अमेरिकी लिजिङ कम्पनी एएआरसँग वाईड बडी जहाज किन्ने सम्झौता गरेको छ । काठमाडौंमा आज गरिएको सम्झौताअनुसार पहिलो विमान २०१८ को अप्रिलसम्ममा आउने गरी सहमति भएको छ भने दोश्रो विमान भने २०१८ कै मे महिनासम्ममा आउने गरी सम्झौता भएको छ ।
नेवानिका प्रबन्ध–निर्देशक सुगतरत्न कंसाकारकाअनुसार दुई वटा विमान दुई सय ९ दशमलब ६ मिलियन अमेरिकी डलर अर्थात २१ अर्ब ९० करोड रुपैयाँमा खरिद गर्ने गरी सम्झौता भएको छ । गत माघ १४ गते निगम र एएआरबीच जहाज खरिदको समझदारी भएको थियो ।
पहिलो चरणमा निगमले खरिदका लागि बैना रकमसमेत पठाएको छ । निगमको इतिहासमै पहिलो पटक वाईड बडी जहाज खरिद गर्न लागेको हो । विगतमा लाउडा जहाज भाडामा ल्याएर सञ्चालन गरेको भए तापनि वाईड बडी जहाज खरिद गर्न लागेको भने यो नै पहिलो पटक हो । निगमले जहाज खरिदको लागि बैना रकम १० करोड ७० लाख रुपैयाँ माघ दोश्रो साता नै पठाइसकेको थियो । सम्झौताअनुसार निगमले अमेरिकन कम्पनीलाई तत्कालै कूल रकमको ३५ प्रतिशत अर्थात सात अर्ब रुपैयाँभन्दा बढी रकम तिर्नुपर्ने छ ।
अमेरिकी लिजिङ कम्पनी एएआर कर्पोरेशनले ‘हाईफ्लाई एयरलाइन्स’को लागि तीन वर्षअघि एयरबस कम्पनीमा अर्डर गरेको थियो । कम्पनीले टेण्डर हाल्दा सबैभन्दा बढी सस्तोमा हालेकोले अव मूल्यमा नेगोसेनस नहुने समेत कंसारकारले स्पष्ट पारे । वायुसेवा निगमले एयरबसको वाईड बडी ‘ए ३३०–२००’ जहाज खरिद गर्न लागेको हो । पहिलो जहाज ०७४ मंसिरमा र दोश्रो जहाज ०७४ को चैत्रभित्रै ल्याइसक्ने योजना निगमकोे रहेको छ । निगमले दक्षिण कोरिया, जापान, अष्ट्रेलिया लण्डन जस्ता गन्तव्यमा उडान गर्ने योजना बनाइरहेको छ । जसमा निगमले उडान गन्तव्यहरू तय गर्नका लागि कार्यसमेत सुरु गरिसकेको छ ।
