काठमाडौ २५ चैत्र ।
आगामी बैशाख ३१ गतेका लागि तोकिएको स्थानीय तहको निर्वाचनको लागि धनकुटामा निर्वाचन केन्द्र थप्ने तयारी गरिएको छ । भौगोलिक कठिनाइका कारण निर्वाचन केन्द्र थप्ने तयारी भएको जनाइएको छ ।
जिल्लाको पाख्रीबास र महालक्ष्मी नगरपालिकामा ३ र छथर जोरपाटी, चौविसे र खाल्सा छिन्ताङ शहीदभुमी गाउँपालिकामा एकएक वटा मतदान केन्द्र थप्न लागिएको जिल्ला निर्वाचन कार्यालय धनकुटाले जनाएको छ ।
भौगोलिक कठिनाइका कारण मतदाताहरु आफ्नो मत प्रयोग गर्नबाट बञ्चित हुनुनपरोस भनेर केन्द्र थप गर्न लागिएको कार्यालयले जनाएको छ । सात केन्द्र थपिएपछि धनकुटामा मतदान केन्द्रको संख्या १ सय १७ पुगेको छ ।
यी केन्द्रबाट धनकुटाका कुल ९५ हजार ८ सय ८७ जना मतदाताले मतदान गर्नेछन् । यो संख्या २०७० सालमा भएको संविधानसभा निर्वाचनको भन्दा १३ हजार २ सय ५५ जनाले बढि हो । २०७० सालमा ८२ हजार ६ सय ३२ मतदाता थिए ।
