काठमाडौं, चैत २३ । उपत्यकाव्यापी सडक विस्तार पीडित संघर्ष समितिले गैर न्यायिक रुपले गरिएको सडक बिस्तारको काम बन्द गर्नुपर्ने माग गर्दै राजधानीमा रिले अनशन सुरु गरेको छ ।
सडक विस्तारको नाममा सर्वसाधारणका घर, टहरा भत्काइएकाले रोक्न माग गर्दै राजधानीको शान्तिबाटिकामा उनीहरु अनशन बसेका छन् ।
समय नदिई सर्वसाधारणका घर प्रहरी प्रशासन प्रयोग गरेर जबरजस्ती भत्काइएको, सम्पत्तिको हक, आवाससम्बन्धि हकको उल्लंघन गरेको भन्दै अराजकता बन्द नगरेसम्म अनशन जारी रहने समितिले जनाएको छ ।
काठमाडौं उपत्यका विकास प्राधीकरण र सडक विभागले स्वेच्छाचारी रुपमा हुकुमी शैली देखाएर सर्वसाधारण जनताको सम्पत्ति अतिक्रमण गरेको उनीहरुको आरोप छ ।
घरको सामान सार्नसम्म नदिएर डोजर लगाएको भन्दै उनीहरुले भत्काईएका घरहरुमा बसोबास गरेकाहरु डेरा नपाएर अहिले बिचल्लीमा रहेको उनीहरुको गुनासो छ ।
रिले अनशनमा काठमाडौं, भक्तपुर र ललितपुरका सडक पीडित सहभागी छन् ।
