काठमाडौँ, २२ चैत ।
सङ्घीय समाजवादी फोरम, नेपालका सहअध्यक्ष राजेन्द्र श्रेष्ठले नेपालको राज्यसत्ता र शासन प्रणालीलाई सबैको साझा बनाउनु पर्नेमा जोड दिनुभएको छ ।
फोरमको काठमाडौँ नागार्जुन नगर समितिको प्रथम एकता अधिवेशनमा बोल्दै उहाँले त्यसका लागी समानुपातिक समावेशी राष्ट्रिय चरित्र आवश्यक भएको बताउनुभयो ।
उहाँले देशमा नेपाली काँग्रेस तथा कम्युनिस्ट पार्टीहरूले समाजवादको कुरा गरे पनि सङ्घीय शासनलाई अन्तर मनले स्वीकार नगरेको आरोप लगाउनुभयो ।
मुलुकमा सङ्घीयता बिनाको समाजवादको औचित्य नहुने भन्दै सहअध्यक्ष श्रेष्ठले सङ्घीय समाजवादलाई सिद्धान्तका रूपमा स्वीकार्ने पार्टीहरूसँग सहकार्य गर्दै पार्टी एकीकरण गरेर अगाडि बढ्ने धारणा व्यक्त गर्नुभयो ।
व्यवस्थापिका–संसद्मा दर्ता भएको संविधान संशोधन प्रस्ताव परिमार्जनसहित पारित नहुँदासम्म नयाँ संविधान कार्यान्वयन हुन नसक्ने बताउनु भयो ।
