काठमाडौं, चैत्र १८ ।
एक समयका चर्चित नायिका श्रीषा कार्कीको अपूरो रहेको नेपाली कथानक नेपाली चलचित्र ‘यातना’को गीत यूट्युबमार्फत सार्वजनिक भएको छ । नायिका कार्कीको आत्महत्यासँगै सो चलचित्रको मुख्य दृष्यको छायाँकन अपुरो रहेको थियो ।
करिब डेढ दशकपछि चलचित्रका निर्देशक उज्ज्वल केसीले गीतलाई बेल्जियमबाट यूट्युबमार्फत सार्वजनिक गरेका थिए । नायिका कार्कीले आत्महत्या गरेपछि चलचित्रको छायाँकन अपुरो हुन पुगेको हो ।
योसँगै अर्को दुःखद् कुरा के रहेको छ भने, सोही चलचित्रका अर्की कलाकार इना हमालले पनि आत्महत्या गरेकी थिइन् भने अन्य कलाकार शान्ती मास्के, गायक कुमार कान्छा, सम्पादक वीरेन्द्र कार्की र छायाँकार राजु मानन्धर पनि हाम्रो सामु रहेनन् ।
‘कलाकार मरे पनि उनीहरूको कला जीवन्त हुन्छ, निर्देशक केसीले भने, अपुरो रहेको चलचित्रलाई पनि केही समयपछि पूरा गरेर सार्वजनिक गर्ने तयारी गरेको छु ।’
मुख्य कलाकारको निधन भएपछि लाखौँ रुपैयाँ लगानी डुबेको भन्दै निर्देशक केसीले लगानी डुबे पनि दर्शकसमक्ष पुर्याउन पाउँदा अहिले छुट्टै आनन्द लागिरहेको भन्दै खुसी व्यक्त गरेका छन् ।
हाल बेल्जियममा रहेका निर्देशक केसीले दर्जनौँ चलचित्र बनाई सकेका छन् भने उनी आफैँ पनि एक कलाकार हुन् । नेपालमा मात्र नभई युरोपका म्यूजिक भिडियोमा पनि उनले आफ्नो क्षमता देखाई राम्रो छाप छाडिसकेका छन् ।
