काठमाडौ, १५ चैत्र ।
नेपाली कांग्रेस केन्द्रीय समितिको जारी बैठकमा मुलुकको पछिल्लो राजनितिक अवस्था र स्थानीय तह निर्वाचन तयारीका सम्बन्धमा छलफल भइरहेको छ ।
बोल्नका लागि नाम टिपाएका सदस्यहरुले बैठकमा धारणा राख्ने क्रम नसकिएपछि बैठक पुनः आजका लागि पनि बोलाइएको छ । अझै दुई दर्जन केन्द्रिय सदस्यले धारणा राख्न बाँकी रहेकाले बैठक अझै केहीदिन लम्बिने कांग्रेसले जनाएको छ ।
ललितपूरको सानेपास्थित पार्टी केन्द्रिय कार्यलयमा बिहान ११ बजेपछि बस्ने बैठकमा नाम टिपाएका बाँकी सदस्हरुले धारणा राख्ने पार्टी सचिवालयले जनाएको छ । बैठकमा हालसम्म २२ जना केन्द्रिय सदस्यहरुले धारणा राखिसकेका छन् ।
बैठकमा बोल्ने अधिकांश सदस्यहरुले सिमांकन बाहेकका विषयमा संविधान संशोधन गरेर मधेशी मोर्चालाई पनि सहभागी गराइ निर्वाचनमा जानुपर्नेमा जोड दिएका छन् भने केहीले निर्वाचन कुनैपनि हालतमा सम्पन्न गराउनुपर्ने धारणा राखेका छन् ।
करिब ५ महिनापछि गत आइतबारबाट सुरु बैठकमा स्थानीय तह निर्वाचनका लागि उमेदवार छनोट तथा कार्यकर्ता परिचालन सम्बन्धमा पनि बैठकमा छलफल भइरहेको नेताहरुले बताएका छन् ।
जारी बैठकले वरिष्ठ नेता रामचन्द्र पौडेलको संयोजकत्वमा केन्द्रीय निर्वाचन परिचालन समिति र केन्द्रीय सदस्य महेश आचार्यको संयोजकत्वमा स्थानीय तह निर्वाचनका लागि घोषणापत्र तयारी समिति समेत गठन गरेको छ ।
