काठमाडौं, ७ चैत्र ।
व्यवस्थापिका संसदको आजको बैठकले दुईवटा विधेयकहरु पारित गरेको छ ।
आज बसेको संसद बैठकले “निर्वाचन क्षेत्र निर्धारण विधेयक, २०७३” तथा “गाउँपालिका तथा नगरपालिकाको वडाको संख्या निर्धारण विधेयक, २०७३” पारित गरेको हो ।
दुबै बिधेयक कानूनमन्त्री अजयशंकर नायकले पारित गरियोस्” भनेर प्रस्ताव प्रस्तुत गर्नुभएको थियो ।
त्यस्तै उपप्रधान एवं संघीय मामिला तथा स्थानीय विकासमन्त्री कमल थापाको तर्फबाट पनि कानूनमन्त्री अजयशंकर नायकले नै “गाउँपालिका तथा नगरपालिकाको वडाको संख्या निर्धारण विधेयक, २०७३” लाई पारित गरियोस्” प्रस्ताव प्रस्तुत गरेका थिए ।
दुबै विधेयकहरु पारित हुनु पूर्व ती विधेयकहरु उपर व्यवस्थापिका संसदमा दफाबार छलफल समेत चलेको थियो भने ती दुई विधेयकहरु उपर परेका तर फिर्ता नलिइएका संशोधन प्रस्तावहरुलाई निर्णयार्थ प्रस्तुत गरिएको थियो ।
उक्त दुबै विधेयकहरुलाई बैठकले परिमार्जन सहित बहुमतले पारित गरेको हो । संसद बैठक भोलि १ बजेसम्मका लागि स्थगित गरिएको छ ।
