काठमाडौ २ चैत्र ।
२१४४ औं ग्यल्बो ल्होछारका अवसरमा काभ्रेको गहतेमा बृहत ल्होछार साँस्कृतिक कार्यक्रम सम्पन्न भएको छ ।
हालै कायम नमोबुद्ध नगरपालिका वडा नम्बर ९ अन्तरगत गहते डिहीको संयुक्त आयोजनामा आयोजित कार्यक्रममा राष्ट्रिय रुपमा चर्चित कलाकारहरुको बेजोड सांगितिक प्रस्तुति रहेको थियो ।
कांग्रेस नेता तथा व्यवस्थापिका संसदका प्रतिनिधि तीर्थ तामाङको प्रमुख आतिथ्यमा सम्पन्न कार्यक्रममा नेकपा माओवादी केन्द्र नमोबुद्ध नगरप्रमुख तथा समाजसेवी रत्न लामा लगायत विभिन्न राजनितिक दलका नेता तथा समाजसेवीहरुको सहभागिता रहेको थियो ।
सोमबार सम्पन्न कार्यक्रममा राष्ट्रिय रुपमा ख्याती प्राप्त गायक विजय लामा, जीतु लोप्चन, प्रयास दोङको बेजोड प्रस्तुतीले सांगितिक माहोल बनेको थियो ।
यस्तै नव गायक अर्जुन लामा, बुद्ध घिसिङ, एक्सन लामा, अशोक मोक्तन लगायत स्थानीय कलाकारहरुको पनि कार्यक्रममा प्रस्तुती रहेको थियो भने हाँस्यकलाकार प्रताप हुँमागाईको हाँस्य व्यङ्ग्यात्मक प्रस्तुतीले दर्शकलाई पेट मिचीमिची हसाउँन सफल भएको थियो ।
कार्यक्रममा स्थानीय कलाकारहरुको नृत्य प्रस्तुती समेत रहेको थियो । कार्यक्रमलाई सम्बोधन गर्दै प्रमुख अतिथि तामाङले आफ्नो भाषा धर्म र संस्कृति संरक्षणका लागि स्थानीय युवाले गरेको पहलको प्रसंशा गर्दै यसलाई निरन्तरता दिदै जानुपर्नेमा जोड दिनुभयो ।
