काठमाडौ २१ फागुन ।
राष्ट्रिय पोलियो खोप अभियान अन्तरगत आजदेखि काठमाडौ उपत्यकासहित पन्ध्र जिल्लामा पाँचवर्ष मुनिका बालबालिकालाई पोलियो थोपा खुवाइदैछ ।
आज र भोलि उपत्यकाका तीन जिल्लासहित तराईका कैलाली, बर्दिया, बाँके, कपिलवस्तु, पर्सा, बारा, रौतहट, धनुषा, महोत्तरी, सप्तरी, सिरहा र सुनसरीमा पोलियो थोपा खुवाउने कार्यक्रम छ ।
उपत्यकाका तीनै जिल्लामा बिहानैबाट खोप कार्यक्रम सुरु भएको बालस्वास्थ्य महाशाखा अन्तरगतको खोप शाखा प्रमुख कृष्णबहादुर चन्दले जानकारी दिनुभयो । पोलियो खुवाइने जिल्लामा केही स्वास्थ्यकर्मीले अवरोध गरे कारबाही गर्न स्वास्थ्य मन्त्रालयले गृह मन्त्रालयलाई निर्देशन दिएको छ ।
स्वास्थ्यमन्त्री गगनकुमार थापाले स्वास्थ्यकर्मीले स्वास्थ्य संस्थामा लगाएको ताला तत्काल खोली निर्विवाद रुपमा पोलियोलगायत नागरिकले पाउने सबै स्वास्थ्य सेवा सञ्चालन गर्न आह्वान गर्नुभएको छ ।
उपत्यका बाहिरका जिल्लाहरुमा पनि हिजै सम्पूर्ण तयारी पूरा भइसकेकाले कुनै अवरोध नहुने महाशाखाले जनाएको छ । यसअघि फागुन पहिलो साताका लागि नै खोप अभियान कार्यक्रम तय गरिएको भएपनि स्वास्थ्यकर्मीको आन्दोलनका कारण अवरुद्ध बनेको थियो ।
