काठमाडौ ,२१ फागुन ।
नेपाली कांग्रेसका वरिष्ठ नेता रामचन्द्र पौडेलले मधेसवादी दलहरुले अहिलेको अवस्थामा स्थानीय तह निर्वाचनको महत्व बुझ्न नसके उनीहरुले राजनीति गर्नुको कुनै अर्थ नरहने बताउनु भएको छ ।
बिराटनगर विमानस्थलमा आज सञ्चारकर्मीसँग कुरा गर्दै पौडेलले मधेसी मोर्चाले लोकतान्त्रिक प्रतिस्पर्धामा आएर जनताको मतमार्फत आफ्ना मागलाई दरिलो बनाउने अवसरका रुपमा स्थानीय तहको निर्वाचनलाई लिनुपर्नेमा जोड दिनुभयो ।
उहाँले लोकतान्त्रिक गणतन्त्रको मेरुदण्डको रुपमा रहेको संघीयता, समावेशिता, गणतन्त्र र लोकतन्त्रलाई बचाइ राख्नका लागि पनि वैशाख ३१ गते निर्वाचन अपरिहार्य रहेको बताउनु भयो ।
पहिला संविधान संशोधन भन्दा पनि स्थानीय तहको निर्वाचन अनिर्वाय भएको भन्दै उहाले लोकतान्त्रिक गणतन्त्रको रक्षाका लागि मधेसवादी दल पनि निर्वाचनमा सहभागी हुनुपर्ने बताउनु भयो ।
